Anëtarë nga të dy krahët politikë të Dhomës së Përfaqësuesve në SHBA paraqitën një rezolutë dypartiake, që bën thirrje për një qasje të re ndaj Iranit.

Kjo, nisur nga intensifikimi i protestave të qytetarëve të vendit islamik dhe nga rritja e represionit të regjimit të ajatollahëve.

Rezoluta, e sponsorizuar nga një numër komisionesh parlamentare të Kongresit amerikan, përfshirë këtu atë për punët e jashtme, për forcat e armatosura dhe sigurinë, mori mbështetjen e shumicës së anëtarëve të Dhomës.

Nisur nga fakti se anëtarët kryesorë të opozitës iraniane ndodhen në Shqipëri, kongresmeni Robert Aderholt, bashkëkryetar i Grupit për Çështjet e Shqipërisë, vlerësoi rolin e vendit tonë në strehimin e tyre.

“Unë dua vetëm të falënderoj qeverinë shqiptare për mbështetjen e saj dhe dua të bëj gjithçka që mundem për t’i inkurajuar ata që të mbështesin një Iran të lirë”, tha Aderholt, kongresmen në SHBA.

Rezoluta i kërkon administratës Biden të mbështesë luftën e popullit iranian për demokraci dhe të drejtat e njeriut, ndërsa dënon shkeljen e tyre nga regjimi iranian dhe mbështetjen e tij ndaj terrorizmit.

Gjithashtu, dokumenti i bën thirrje administratës që të ndërmarrë hapa për ta mbajtur regjimin përgjegjës për sjelljen e tij, për aktivitetin bërthamor dhe për programin e raketave balistike./euronews